काठमाडौं ,६ जेठ । सामाजिक अभियान्त जुनु पुन मगर वर्षको उत्कृष्ट मगर घोषणा भएकी छिन् । बागलुङकी पुन मगरलाई सामाजिक संस्था नेपाल मगर संजाल क्लबले वर्षको उत्कृष्ट मगर घोषणा गरेकाे हाे । उत्कृष्ट मगर घोषित भएकी जुनु अनाथ तथा असहाय बालबालिका आमा हुन् । जुनुले देशभरिका अनाथ बालबालिकालाई आमाको माया र ममताका साथै उनीहरुको शिक्षा, अनुशासन र भविष्यको बाटो समेत कोरिदिने काम गर्दै आएकी छिन् । ` भाषा,कला,संस्कृति र भेषभुषाको संरक्षण, मगर एकता हाम्रो अभियान ´ भन्ने मूल नारा लिएर स्थापना भएको सो क्लबको गत बैशाख २५ गते भर्चुअल बैठकले जुनु पुनलाई उत्कृष्ट मगर वर्ष घोषणा गरेको मगर संजाल क्लबका अध्यक्ष तिलक पुन मगरले जानकारी दिए । क्लबले प्रत्येक वर्ष यस्तो उत्कृष्ट मगर घोषणा गर्ने गरेकाे छ । कोरोना महामारीको दिस्रो लहर फैलिएको भयावह स्थितिमा भौतिक उपस्थितिमा वार्षिकोत्सव मनाउन नसकिएको अध्यक्ष पुन मगरले बताए । उनका अनुसार भौतिक उपस्थितिमा जम्मा भएर वार्षिकोत्सव मनाउने खर्चले विभिन्न कारण पीडित भएकाहरुलाई सहयोग गर्ने निर्णय क्लबले गरेका छन् । उक्त खर्चबाट रामेछापका मन्थली घर भई हाल काठमाडौं, नयाँ बसपार्क बस्ने रिता रानामगर र धादिङका ब्लड क्यान्सर पीडित मिलन परियारलाई सहयोग गर्ने अध्यक्ष पुन मगरको भनाइ छ । मगर संजाल क्लबले आफ्नो भेषभुषा, कला, संस्कृतिको संरक्षण र सम्बर्द्धन मात्र नभई मगर युवाहरूलाई नेपाल सरकारको नीति अनुरुप ` स्वास्थ्यको लागि खेल,राष्ट्रको लागि खेल ´ लाई पनि आत्मसात गरि खेलकुदको विकासमा टेवा पुर्याउने लक्ष्य राखेको अध्यक्ष मगरले बताए । उनका अनुसार सामाजिक संजाल तथा विभिन्न संचारमाध्यमबाट जनचेतना मुलुक कार्यक्रम संचालन गर्ने, प्रत्येक बर्ष विभिन्न विधाका व्यक्तित्वहरु छानेर क्लबको वार्षिक उत्सवको अवसरमा सम्मान तथा पुरस्कृत गर्ने मगरले बताए । उनका अनुसार विश्वभरी रहेका मगर समुदायभित्र वा विभिन्न सामाजिक विकासमा महत्त्वपूर्ण योगदान दिने मगरलाई छनोट गरेर सम्मान तथा पुरस्कृत गर्ने छन् ।
फेसबुकबाट तपाईको प्रतिक्रिया